Polesine

Tera e aqua, aqua e tera
da putini che da grandi
“Siora aqua ai sò comandi
aqua nostra bonasera.”

Tera e aqua, se lavora
soto un sole che cusina
tera e aqua, la matina
se scomissia de bonora.

Tera e aqua, a mezogiorno
quel paneto che se magna
no gh’è aqua che lo bagna
e gh’è aqua tuto intorno.

Tera e aqua, co vien sera
tuti intorno, dona e fioi
a una tecia de fasoi
se ghe fa una bona siera.

Tera e aqua, po’ la note
se se buta sora el leto
e se sogna par despeto
aqua e tera, piene e rote.

Tera e aqua, aqua e tera
da putini che da grandi
“Siora aqua ai sò comandi
aqua nostra bonasera.”