La canta dla Tîz

di Fausto Carpani

   

Ai é una tîz in mèz ala canpâgna

dóvv ala sîra as sént dla zänt cantèr

dla rôba antîga ch' vén dala muntâgna,

dla rôba nôva scrétta par sburdlèr.

 

Ômen e dôn insàmm a fèr tuglièna,

bâs e cuntrèlt, barétton e tenûr,

dla bèla zänt alîgra, stièta e sèna

che lé i s ardûsen quand l é bèle bûr.

 

I tèsn i gréll s'i én drî ch'i fan la prôva,

as chiêta al vänt e a l s métt trancuéll al cócc:

quand i cminzéppien con na canta nôva

pr infén i can i sméttn ed fèr dal plócc.

 

Cla vècia tîz in mèz ala canpâgna

indóvv i andèvn a trabb i cuntadén,

l'é turnè a nâser cum la fà la spâgna

quand dåpp la piôva ai vén al suladén.

 

Cantè, ragâz, in mèz ala canpâgna!

Cantè l amåur, la vétta, l'alegrî,

l é bèl al vîver quand as båvv e s mâgna

cunpâgna quand s andèva al'ustarî.

 

.........................................................................

 

Ai é una tîz in mèz ala canpâgna

dóvv ala sîra as sént dla zänt cantèr ...

 

 

 

Bologna, 1 giugno 1997